У Польшчы прайшлі дэбаты паміж двума фіналістамі прэзідэнцкай гонкі

• 24.05.2025, 8:52

Сярод галоўных тэм - Украіна і мяжа з Беларуссю.

У пятніцу, 23 траўня 2025 года, у Польшчы адбыліся прэзідэнцкія дэбаты паміж двума кандыдатамі: Рафалам Тшаскоўскім ад «Грамадзянскай кааліцыі» і Каралем Наўроцкім ад «Права і справядлівасці» (PiS). Дэбаты доўжыліся дзве гадзіны і засяродзіліся на ключавых пытаннях унутранай і замежнай палітыкі, асабліва што да Украіны і стаўлення да Еўрапейскага Звязу і міграцыі.

Унікальнасць дэбатаў палягала ў тым, што кандыдаты самі задавалі адзін аднаму пытанні ў шасці блоках, прысвечаных ахове здароўя, міжнароднай палітыцы, эканоміцы, сацыяльнай палітыцы, пытанням бяспекі і светапогляду, паведамляе tvp.info.

Асноўныя моманты дэбатаў

Падтрымка Украіны і бяспека: Абодва кандыдаты выказалі падтрымку Украіне ў яе вайне з Расеяй. Аднак іх падыходы адрозніваліся. Тшаскоўскі падкрэсліў важнасць прадаўжэння вайсковай дапамогі Украіне і папракаў Наўроцкага за яго крытыку планаў ЕЗ па ўзмацненні абароны, назваўшы яго пазіцыю «мовай, якая спрыяе Пуціну».

Наўроцкі казаў аб тым, што Польшча ў сваёй бяспецы павінна зрабіць стаўку на ЗША, бо ў краіне знаходзяцца 10 тысяч амерыканскіх вайскоўцаў. Ён пахваліў урад «Права і справядлівасці», які надаў вайсковую дапамогу Украіне пасля пачатку вайны.

Будучыня Украіны ў NATO: Наўроцкі заявіў, што як прэзідэнт Польшчы не падпіша дакумент аб прыняцці Украіны ў Альянс. Кандыдат ад «Права і справядлівасці» падкрэсліў, што пытанне ўступлення Украіны ў NATO пакуль не стаіць на парадку дня, бо Кіеў павінен правесці рэформы.

Эканамічныя пытанні: Абодва кандыдаты выказалі занепакоенасць з нагоды імпарту танных сельскагаспадарчых тавараў з Украіны, бо яны могуць нанесці ўдар па польскіх фермерах.

Тшаскоўскі спытаў кандыдата ад «Права і справядлівасці», як ён ставіцца да тарыфаў, якія Трамп хоча ўвесці супраць ЕЗ. Наўроцкі запэўніў, што яму ўдалося наладзіць асабістыя ўзаемастасункі з прэзідэнтам ЗША падчас візіту ў Вашынгтон, а пасля яго паездкі Белы дом зняў абмежаванні для Польшчы па мікрачыпах. Тшаскоўскі запэўнівае, што пастанова была прынятая да паездкі кандыдата ад «ПіС» у ЗША.

Наўроцкі папракаў кандыдата ад «Грамадзянскай кааліцыі» за прыхільнасць «зялёнай палітыцы», якая прывяла да падаражання электраэнэргіі ў краіне.

Міграцыйная палітыка стала важнай тэмай абмеркавання, асабліва ў кантэксце нападаў на польскую мяжу з Беларусі. Наўроцкі папракнуў Тшаскоўскага ў тым, што пакуль «Права і справядлівасць» будавала загароду на мяжы з Беларуссю падчас нападаў нелегалаў, якія пачаліся ў 2021 годзе, некаторыя палітыкі «Грамадзянскай кааліцыі» крытыкавалі кіроўную партыю за «жорсткасць на мяжы». Тшаскоўскі заявіў, што «агароджа на мяжы была дзіравай», а менавіта цяперашні ўрад зрабіў межы Польшчы бяспечнымі.

Тшаскоўскі заявіў, што Польшча павінна заставацца адкрытай для бежанцаў, прынамсі, для ўкраінцаў, якія ўцякаюць ад вайны. Ён адзначыў, што Польшча мае абавязак перад Украінай і яе народам, і павінна працягваць даваць прытулак тым, хто мае патрэбу ў абароне. Аднак кандыдат ад «Грамадзянскай кааліцыі» таксама падкрэсліў, што міграцыйная палітыка павінна быць збалансаванай і ўлічваць інтарэсы краіны.

Нагадаем, першы тур прэзідэнцкіх выбараў у Польшчы прайшоў 18 траўня. У першым туры з мінімальнай перавагай перамог кандыдат ад «Грамадзянскай кааліцыі» Рафал Тшаскоўскі - 31,36%, другім стаў кандыдат ад «Права і справядлівасці» Караль Наўроцкі, які набраў 29,54%. Другі тур адбудзецца 1 чэрвеня. Новаабраны прэзідэнт павінен прыняць прысягу да 6 жніўня 2025 года.